Protestuesit në Iran sfiduan shtypjen vdekjeprurëse të qeverisë të shtunën në mbrëmje, duke dalë në rrugë pavarësisht raporteve që sugjeronin se qindra njerëz janë vrarë ose plagosur nga forcat e sigurisë në tre ditët e fundit. Videot dhe rrëfimet e dëshmitarëve okularë tregojnë se qeveria po forcon reagimin e saj, ndërsa vazhdon ndërprerja e internetit në vend. Prokurori i përgjithshëm i Iranit, Mohammad Movahedi Azad, tha të shtunën se kushdo që proteston do të konsiderohet "armik i Zotit", një vepër penale që dënohet me vdekje në Iran. Më shumë se 2,500 njerëz janë arrestuar që kur filluan protestat më 28 dhjetor, sipas një grupi për të drejtat e njeriut. Protestat u nxitën nga inflacioni në rritje dhe janë përhapur në më shumë se 100 qytete në çdo provincë në Iran. Tani protestuesit po bëjnë thirrje për t'i dhënë fund sundimit të Udhëheqësit Suprem të Iranit, Ajatollah Ali Khamenei. Ky i fundit i ka quajtur demonstruesit; një "grup vandalësh" që kërkojnë të "kënaqin" Presidentin e SHBA-së, Donald Trump. Presidenti amerikan ka kërcënuar se do ta godasë Iranin "shumë rëndë" nëse "fillon të vrasë njerëz".