Vrasja në Teheran e Ismail Haniyeh, liderit politik të Hamasit ka tronditur rajonin, duke rritur përsëri mundësinë e një luftë të përgjithshme mes Iranit dhe armikut të tij të përbetuar, Izraelit. Haniyeh u vra mëngjesin e të mërkurës në një lagje të pasur në Teheran, pak pasi kishte marrë pjesë në ceremoninë e inaugurimit të presidentit iranian, Masud Pezeshkian, në Parlament. Kjo është vrasja më e fundit në një varg vrasjesh brenda dhe përreth kryeqytetit iranian në vitet e fundit, për të cilat Republika Islamike e ka fajësuar Izraelin. Izraeli nuk e ka marrë përgjegjësinë për asnjërën prej këtyre vrasjeve. Analistët thonë se vrasja e Haniyehut është goditje e rëndë për reputacionin tanimë të njollosur të organeve të sigurisë së Iranit dhe se do ta nxisë Teheranin të hakmerret. Megjithatë, përgjigja nuk pritet të vijë drejtpërdrejt nga Republika Islamike. Vrasja e Haniyehut në Teheran në një kohë kur siguria ishte shumë e lartë për shkak të pranisë së dhjetëra zyrtarëve të lartë iranianë dhe të huaj për inaugurimin e Pezeshkianit, ka nxitur edhe polemika.