Policia e Vorës ka dokumentuar dhe zbardhur rrethanat e një ngjarjeje të ndodhur mëngjesin e së hënës në fshatin Marikaj, ku një 40-vjeçar ka mbetur i plagosur me armë zjarri. Nga hetimet rezulton se shtetasi Elton Andreica Muça është vetëplagosur aksidentalisht në banesën e tij, me një armë zjarri që e posedonte pa leje. Pas ngjarjes, ai ka qëlluar disa herë me armën në ajër, me qëllim që të inskenonte një atentat të rremë ndaj vetes. Gjithashtu, për të fshehur të vërtetën, dyshohet se ka hequr DVR-në e një kamere sigurie pranë banesës së tij. Në përfundim të hetimeve, ky person i cili është i dënuar më parë për armëmbajtje pa leje dhe vepra penale kundër pronës, u vu në pranga nga policia. Ai aktualisht ndodhet në spital, jashtë rrezikut për jetën.