21 persona janë arrestuar pas incidenteve të regjistruara gjatë protestës së opozitës, ku u hodhën shishe molotov dhe u plagosën 16 efektivë policie. Policia njofton se, përveç të arrestuarve, janë vënë nën hetim edhe pesë anëtarë të Partisë Demokratike, mes tyre sekretari organizativ Ervin Minarolli, si dhe katër deputetë: Belind Këlliçi, Flamur Noka, Klevis Balliu dhe Luan Baçi. Në cilësinë e provës materiale janë sekuestruar 22 shishe molotov të pashpërthyera dhe 3 shishe me benzinë, të gjetura pranë godinës së Kuvendit. Gjatë protestës janë hedhur flakadanë, molotovë, fishekzjarrë dhe gurë në drejtim të forcave të policisë, si edhe ndaj godinës së Kryeministrisë dhe Kuvendit. Si pasojë e përplasjeve, mbi 30 persona janë shoqëruar në komisariat për verifikime, ndërsa hetimet vijojnë për zbardhjen e plotë të ngjarjes.