Presidenti i Polonisë i ka bërë thirrje SHBA-së që të transferojë armë bërthamore në territorin e saj si një pengesë kundër një agresioni të ardhshëm rus, raportoi të enjten Financial Times. Presidenti Andrzej Duda tha gjithashtu për gazetën se kishte diskutuar propozimin së fundmi me të dërguarin special të presidentit amerikan Donald Trump për Ukrainën dhe Rusinë, Keith Kellogg. Polonia ka thënë më herët se do të ishte gati të priste armët e SHBA-së nën një program për ndarjen e armëve bërthamore, dhe politikëbërësit polakë kanë shprehur gjithashtu interes kohët e fundit për një ide të lëshuar nga presidenti francez Emmanuel Macron që ombrella bërthamore e Parisit të mund të shtrihet tek aleatët evropianë. "Kufijtë e NATO-s u zhvendosën në lindje në 1999, kështu që 26 vjet më vonë duhet të ketë gjithashtu një zhvendosje të infrastrukturës së NATO-s në lindje. Për mua kjo është e qartë," citoi FT të ketë thënë Duda në një intervistë. Do të ishte më e sigurt nëse ato armë do të ishin vendosur tashmë në vend, shtoi Duda. Kryeministri polak Donald Tusk, një kundërshtar politik i Dudës, tha të enjten se mendonte se ishte më mirë të trajtoheshin çështje të tilla në mënyrë diskrete sesa në intervista në media, megjithëse ai shtoi se besonte se presidenti kishte qëllime të mira. “Ne duhet të formulojmë disa pritshmëri… publikisht kur jemi të sigurt, ose kemi arsye për t’u bindur, se apele apo thirrje të tilla do të dëgjohen dhe se adresuesi, në këtë rast administrata amerikane, Presidenti Trump, është i përgatitur për një përgjigje pozitive”, u tha Tusk gazetarëve. E shtyrë nga pushtimi rus i Ukrainës fqinje tre vjet më parë, Polonia tani shpenzon një përqindje më të lartë të prodhimit të saj të brendshëm bruto (PBB) në mbrojtje se çdo anëtar tjetër i NATO-s, përfshirë Shtetet e Bashkuara. Vitin e kaluar, shpenzimet e mbrojtjes së Polonisë arritën në 4.1% të PBB-së, sipas vlerësimeve të NATO-s, dhe ajo planifikon të arrijë në 4.7% këtë vit. Duda ka sugjeruar përfshirjen e shpenzimeve të mbrojtjes prej të paktën 4% të PBB-së në kushtetutën polake.