Të rinjtë në Beograd, Prishtinë dhe Berlin kanë pikëpamje të ndryshme për kthimin e shërbimit të detyrueshëm ushtarak. Gjithnjë e më shumë po flitet për të, por ka probleme serioze. Dojce Velle ka biseduar me disa të rinj në rrugët e Beogradit, që e mbështesin rikthimin e shërbimit të detyrueshëm ushtarak, për arsye të ndryshme, që nga kërcënimet me të cilat përballet sot bota e deri tek ai që ata e quajnë feminizimi i meshkujve. Shërbimi i detyrueshëm ushtarak ka qenë temë debati në Serbi prej vitesh. Por tani është aktualizuar sërish, pasi Shtabi i Përgjithshëm i propozoi "komandantit suprem” Aleksandar Vuçiç rikthimin e tij. "Na duhet një periudhë e caktuar kohore që qendrat tona të rekrutimit të punojnë me kapacitet të plotë”, tha së fundmi ministri i Mbrojtjes, Millosh Vuçeviç. "Kanë kaluar 13 vite nga pezullimi dhe nga ajo periudhë kemi 13 gjenerata që nuk janë as pjesë e reparteve rezervë. Pyetja kryesore mbetet, a duam një ushtri më të fortë apo më të dobët?" – pyet ai. Nga ana tjetër, ekspertët mendojnë se ushtria profesionale po bie. Ashtu si edhe në shumë vende evropiane, ushtria nuk ka mjaftueshëm njerëz. Edhe kryeministri kroat Andrej Plenkoviç ka paralajmëruar rikthimin e shërbimit të detyrueshëm ushtarak pas mbarimit të shkollës së mesme. Debati në Kroaci është i ngjashëm me atë në Serbi. Njoftime vijnë edhe nga Lëvizja "Vetëvendosje” e Albin Kurtit në Kosovë. "Do të ishte mirë që çdo i ri të jetë i gatshëm për çdo gjë, nëse vendi përballet me ndonjë lloj konflikti”, thotë një i ri në Prishtinë. Siç shkruan DË, një sërë vendesh evropiane kanë rikthyer shërbimin e detyrueshëm ushtarak në dhjetë vitet e fundit. Ukraina dhe Lituania e bënë këtë pas aneksimit të Krimesë, Suedia që nga viti 2018, Letonia që nga ky vit. Në Norvegji dhe Danimarkë, ushtria është e detyrueshme, por ka mjaft vullnetarë për të rimbushur forcat, kështu që askush nuk detyrohet të shkojë në fund. Edhe në Gjermani është ndezur diskutimi për kthimin e shërbimit të detyrueshëm ushtarak. Një sondazh i fundit tregon se 52 për qind e gjermanëve e mbështesin shërbimin e detyrueshëm, ndërsa 32 për qind janë kundër tij.