Gjykata Themelore në Prishtinë ka pranuar kërkesën e Prokurorisë Speciale, për përcaktimin e masës së paraburgimit ndaj shtetasit serb me iniciale D.N., të dyshuar për krime lufte kundër popullsisë civile. Ai dyshohet se nën cilësinë e komandantit të nënstacionit polcior në Zhegër s’kishte ndërmarrë asnjë veprim që të parandalojë apo ndëshkojë kryerësit e krimeve ndaj popullsisë civile nga forcat serbe dhe paramilitarët serb, kur janë vrarë 13 anëtarë të dy familjeve më 30 prill të vitit 1999. Sipas Gjykatës, edhe pse komandanti I nënstacionit policor në Zhegër, ka marrë një letër nga dy shtetas të dëmtuar nga krimet, Nuk ka ndërmarrë veprime brenda kompetencave të tij. Më tej, Gjykata arsyeton se komandanti duke mos-marrë veprime, është pajtuar me pasojat, ndërsa për këtë rast ka edhe dëshmi nga të dëmtuarit dhe dëshmitarët. Sipas Gjykatës Themelore në Prishtinë, vepra penale është e natyrës së rëndë dhe komplekse, dhe se masa e paraburgimit për të në këtë rast është e domosdoshme. Sipas organit të drejtësisë, eksziston rreziku që shtetasi, nëse gjendet në lirim të mundet të arratiset.