Franca ka njoftuar një marrëveshje "historike" me Kaledoninë e Re, në të cilën territori i ndarë, i tronditur nga dhuna vdekjeprurëse separatiste vitin e kaluar, do të mbetet francez, por do të shpallet shtet. "Një shtet i Kaledonisë së Re brenda Republikës: është një bast për besimin", shkroi presidenti francez, Emmanuel Macron, në platformën X të shtunën, duke përshëndetur një marrëveshje që ai e quajti "historike". Duke pritur firmëtarët në një takim, më vonë, presidenti tha se "pas dy marrëveshjeve dhe tre referendumeve, Kaledonia e Re, përmes asaj që tani është nënshkruar, po hap një kapitull të ri në të ardhmen e saj, në një marrëdhënie paqësore me Francën". Macron kishte bërë thirrje për bisedime për të thyer një ‘status quo’ mes forcave besnike ndaj Francës dhe atyre që duan pavarësi. Zyrtarët e zgjedhur të Kaledonisë së Re, si dhe udhëheqës politikë, ekonomikë dhe të shoqërisë civile, u mblodhën afër Parisit për të hartuar një kornizë kushtetuese për territorin. Pas 10 ditësh bisedimesh, palët ranë dakord që duhet të krijohet një “Shteti i Kaledonisë së Re”. Manuel Valls, ministri për territoret jashtë shtetit, e quajti atë një “kompromis inteligjent” që ruan lidhjet mes Francës dhe Kaledonisë së Re, por me më shumë sovranitet për ishullin e Paqësorit. Prioriteti tani është rimëkëmbja ekonomike e Kaledonisë së Re. Dhuna e vitit të kaluar, e cila mori jetën e 14 personave, vlerësohet se i ka kushtuar territorit 2 miliardë euro.