Agjentët e Byrosë Kombëtare të Hetimit kanë ndërmarrë një operacion këtë të martë në Bashkinë e Klosit në kuadër të një hetimi për krimet zgjedhore. Burimet bëjnë me dije se gjatë këtij operacioni nuk ka persona të shoqëruar, por me urdhër të SPAK janë sekuestruar disa sende, që prokurorët e posaccëm besojnë që janë të vlefshme për hetimin. Mes sendeve të sekuestruara janë telefonat e disa zyrtarëve të kësaj bashkie. SPAK nuk ka dalë ende me një deklaratë publike në lidhje me këtë operacion dhe as nëse ka persona konkretë nën hetim. Bashkia e Klosit është pjesë e Qarkut të Dibrës, ku Partia Socialiste siguroi 3 mandate kundrejt dy mandateve të koalicionit opozitar të drejtuar nga Partia Demokratike. Më konkretisht, në Bashkinë e Klosit, PS ka siguruar 4500 vota, ose 60 për qind të totalit të votuesve.