Operacioni ‘Koordinata’ ka goditur një tjetër rast të kultivimit të bimëve narkotike. Gjatë aksionit të fundit në prangat e policisë ka rënë Myrtezan Hoxha, i cili u kap teksa kujdesej për bimët narkotike në një zonë pyjore pranë banesës së tij në fshatin Grazhdan. Ai u arrestua nga policia e Gramshit, pas një hetimi njëmujor në bashkëpunim me prokurorinë e Elbasanit. Gjatë kontrolleve të mëtejshme në banesën e tij, shërbimet e Policisë zbuluan dhe sekuestruan dy armë gjahu të mbajtura pa leje, dy radio komunikimi të ngjashme me ato të përdorura nga Policia, si dhe 60 fishekë të kalibrave të ndryshëm. Në vijim të hetimeve, është shpallur në kërkim edhe djali i të arrestuarit, banues në Tiranë, pasi dyshohet se ka bashkëpunuar me të atin në veprimtarinë e kundërligjshme të kultivimit të kanabisit. Të gjitha bimët narkotike të zbuluara në këtë rast janë asgjësuar, ndërsa armët, radiot dhe municioni janë sekuestruar si prova materiale.