Ministri i Mbrojtjes, Niko Peleshi ka reaguar pas aksionit të Policisë së Shtetit, e cila zbuloi një parcelë me kanabis në repartin ushtarak në Zall Herr. Në një mesazh në rrjetet sociale Peleshi njoftoi se ka pezulluar nga detyra përgjegjësit e repartit. “Bashkëpunimi mes Policisë së Shtetit dhe Policisë Ushtarake, bëri të mundur evidentimin dhe më pas asgjësimin e 125 bimëve kanabis, të cilat ishin kultivuar në një zonë të pyllëzuar, në territorin e zonës ushtarake të Zall Herrit. Menjëherë janë pezulluar nga detyra të gjithë personat përgjegjës.” Më tej ministri Peleshi ka inkurajuar organet ligjzbatuese të bëjnë detyrën në çdo rast. Më parë ka reaguar dhe Ministri i Brendshëm Taulant Balla, sipas të cilit lufta kundër kultivimit, trafikimit dhe shpërndarjes së lëndëve narkotike do të jetë sistematike. Përmes një postimi në rrjetin social Facebook Balla ka përshëndetur Policinë e Shtetit e cila ka angazhuar në operacionet antikanabis më shumë se 6000 forca policie dhe 75 dronë të cilësisë së lartë.