Një punë hetimore disa javore në kuadër të operacionit policor të koduar ‘Restart’, ka evidentuar dhe goditur një skemë shfrytëzimi prostitucioni, në qytetin e Pogradecit. Veprimtaria kriminale e ushtrimit të prostitucionit kryhej në ambjentet e një subjekti bar-kafe dhe hotel në Tushemisht. Ka qenë vetë pronari i hotelit, në bashkëpunim me administratoren dhe dy shtetas të tjerë të cilët lejonin ushtrimin e prostitucionit në ambjentet e hotelit, duke e kthyer në një aktivitet fitimprurës. Ndërkohë nga verifikimet e mëtejshme ka rezultuar se ky subjekt jo vetëm që lejonte ushtrimin e prostitutcionit, por edhe ushtronte aktivitet ekonomik informal pasi nuk kishte kryer regjistrimin e subjektit pranë organeve tatimore. Si rezultat shërbimet policore të Policisë Pogradec, në bashkëpunim me strukturat për Hetimin e Krimeve në Korçë, kanë arrestuar në flagrancë 4 shtetas, ndër të cilët edhe një e mitur 17 vjecare. Materialet i kaluan Prokurorisë pranë Gjykatës së Shkallës së Parë Pogradec, për veprat penale "Prostitucioni", "Shfrytëzimi i prostitucionit" kryer në bashkëpunim, "Mbajtja e lokaleve për prostitucion" dhe "Fshehja e të ardhurave”.