Ministri i Mbrojtjes Boris Pistorius i ka premtuar ndihma të tjera miliarda euroshe Ukrainës në fushën ushtarake, për armatime. Me presidentin ukrainas Volodymyr Zelenski ai ra dakord për prodhimin e përbashkët të armatimeve. Pistorius tha gjatë vizitës në Kiev, se synohet që Ukraina të mbështetet shpejt me sisteme të mbrojtjes ajrore. Krahas shtatë miliardë eurove të miratuara muajt e fundit do të vihen në dispozicion edhe 1,9 miliardë euro të tjera dhe me këto para mund të paguhen pjesërisht sistemet e armatimit me rreze të gjatë veprimi, të cilat do të prodhohen në Ukrainë. "Këto sisteme mund të vihen në muajt e ardhshëm në dispozicion", tha Pistorius në një konferencë të përbashkët shtypi me presidentin ukrainas, Zelenski. "Për sa i takon prodhimit, ne do të prodhojmë në Ukrainë si edhe në Gjermani", tha Zelenski gjatë konferencës për shtyp. Po ashtu do të bisedohet edhe "për armët tona me rreze të gjatë veprimi, dronët tanë dhe teknologjinë e raketave ukainase si dhe për mundësi të tjera.