Banorët e disa fshatrave në Greqi u evakuuan të enjten pa pësuar lëndime, teksa forcat zjarrfikëse luftonin me zjarrin e parë masiv për këtë vit. 6 fshatra dhe 2 manastire u evakuuan, pasi një zjarr shpërtheu mbrëmjen e së mërkurës pranë fshatit Skinos, në Gjirin e Korintit, 90 km në perëndim të Athinës. Banorët thanë se mezi arritën të visheshin, për t’u spostuar më pas nga policia drejt fshatit fqinj Alepokori, për arsye sigurie. Në ndihmë të forcave zjarrfikëse u dërguan përforcime nga i gjithë vendi. Sipas autoriteteve lokale, zjarri ka rënë në një pyll me pisha, në një terren të vështirë me një rreze prej 10 kilometrash. Zjarri u hap gjatë natës në parkun natyror të mbrojtur në malin Geraneia. Aty gjendet një pyll i dendur i paprekur më parë nga zjarret. Shqetësim të madh përbën edhe ndryshimi i drejtimit të erës. Re të mëdha tymi mund të shiheshin që nga kryeqyteti i Greqisë, Athina.