Policia e Shtetit ka shpallur zyrtarisht hapjen e procesit të aplikimeve për pozicionet e larta drejtuese “Drejtor Departamenti” dhe “Drejtor Vendor i Policisë”. Sipas njoftimit zyrtar, aplikimet do të jenë të hapura nga data 3 deri më 11 nëntor, dhe në këtë proces mund të marrin pjesë punonjësit e policisë që mbajnë grada të rolit të mesëm drejtues. Në bazë të urdhrit të Drejtorit të Përgjithshëm të Policisë së Shtetit, aplikimet janë hapur për pozicionet drejtor Departamenti në Departamentin për Kufirin dhe Migracionin, drejtor Departamenti në Departamentin për Marrëdhëniet Ndërkombëtare, drejtor Vendor i Policisë në Elbasan, pas dorëheqjes së mbajtësit të mëparshëm të detyrës, drejtor Vendor i Policisë në Shkodër, pas shkarkimit nga detyra të drejtorit më 10 korrik 2025. Policia e Shtetit fton të gjithë punonjësit e saj të kualifikuar që të aplikojnë për këto poste, duke garantuar një procestë drejtë, profesional dhe në përputhje me standardet më të larta të integritetit institucional.