Lideri i krahut ushtarak të Hamasit, Mohammed Deif, është vrarë në një sulm ajror izraelit në Gaza muajin e kaluar, tha ushtria izraelite të enjten, një ditë pasi lideri politik i grupit u vra në Teheran. "Forcat e Mbrojtjes së Izraelit njoftojnë se më 13 korrik 2024, avionët tanë luftarakë goditën në zonën e Khan Yunisit dhe pas një vlerësimi të inteligjencës, mund të konfirmohet se Mohammed Deif u eliminua në këtë sulm", tha ushtria. Hamasi nuk ka bërë ende komente për njoftimin e izraelit, që erdhi ndërsa turma njerëzish u mblodhën në Teheran për të marrë pjesë në ceremoninë e varrimit të liderit politik të Hamasit, Isamil Haniyeh. Deif besohet se ka qenë një nga organizatorët e sulmit të Hamasit më 7 tetor në jug të Izraelit, i cili shkaktoi edhe luftën në Gaza që tashmë ka hyrë në ditën e saj të 300-të. Një nga figurat më dominuese të Hamasit, Deif u ngjit në majat e grupit për 30 vjet, duke zhvilluar rrjetin e tij të tuneleve dhe duke ofruar ekspertizën e tij për prodhimin e bombave. Ai ka kryesuar listën e më të kërkuarve të Izraelit për dekada, i cilësuar personalisht përgjegjës për vdekjen e dhjetëra izraelitëve në sulme vetëvrasëse.