Një zyrë ndërkombëtare që do të hetojë Rusinë për pushtimin e saj të Ukrainës është hapur tashmë në Hagë. Ky është hapi i parë drejt një gjykate të mundshme kundër udhëheqjes në Moskë. Qendra Ndërkombëtare për Ndjekjen e Krimit të Agresionit (ICPA) ka prokurorë nga Kievi, Bashkimi Evropian, Shtetet e Bashkuara dhe Gjykata Ndërkombëtare Penale (ICC). Kjo zyrë do të hetojë dhe do të mbledhë dëshmi, në një lëvizje që po shihet si hap i përkohshëm para krijimit të një gjykate speciale, që mund të sjellë para drejtësisë zyrtarët e Kremlinit për nisjen e luftës në Ukrainë. Thirrjet për krijimin e një gjykate speciale për Ukrainën janë shtuar sepse ICC-ja, gjykata për krime të luftës që po ashtu ka selinë në Hagë, nuk ka mandat për të hetuar krimin e gjerë të agresionit. ICC-ja po heton krime më specifike të luftës dhe krime kundër njerëzimit në Ukrainë dhe në mars lëshoi një urdhërarresti për presidentin rus, Vladimir Putin, lidhur me akuzat për dëbimin e fëmijëve. Kievi kërkon ndërkohë krijimin e një gjykate speciale që kur zbuloi qindra trupa të pajetë nëpër rrugët e Bucas, pranë Kievit, pas tërheqjes që andej të ushtarëve të Putinit në prill të vitit të kaluar.