Gratë greviste në Ballsh duken të vendosura t`I qëndrojnë kërkesave të tyre, edhe pse gjendja vazhdon t`i rëndohet dita-ditës. Me grevën e hyrë tashmë në ditën e 14-të, ato këmbëgulin në një zgjidhje të situatës dhe thonë se e vetmja që që u intereson janë rrogat e fituara me gjyq. Kryeministri Edi Rama u drejtoi një tjetër apel për ta gjetur zgjidhjen duke shmangur situatat ekstreme. “ Të dashura greviste të Ballshit, është e drejta juaj të mos dilni nga greva, por është e pamundur të ulemi bashkë me presione e ultimatume! Jam gati të vij tek ju sapo të mbyllni grevën e të flasim si do mundemi t’ju ndihmojmë për këtë hall që nuk e ka krijuar qeveria. Ne po punojmë për të gjetur investitorë seriozë që të rindezin rafinerinë edhe pse greva juaj nuk ndihmon as për këtë! Ndërsa për ndihmën e mundshme shtetërore ndërkohë, meqë ju s’pranoni as të dilni në asistencë, ka vetëm një rrugë: Mbyllni grevën dhe ulemi qajmë hallin!”, ka shkruar ai në Twitter. Katër ditë më parë, një prej grave u dërgua me ugjencë në spital në gjendje të rënduar shëndetësore. Grevën e nisën burrat për 18 ditë e tashmë gratë, të cilat më herët kanë thënë se nëse nuk vazhdojnë dot vetë, do të fusin aty edhe fëmijët.