Vetëm pak orë pas ekzekutimit mafioz të shqiptarit Aristidhi Pappas, rrugët e Greqisë janë përgjakur sërisht. Boksieri i mirënjohur grek, me origjinë nga Patras, Tassos Berdesis, 39 vjeç u ekzekutua me një breshëri plumbash rreth orës 9 të mëngjesit të kësaj të hëne. Atentati mafioz ndodhi në rrugën Andrea Papandreou. Tassos Berdesis sapo kishte dalë nga palestra, ku kishte përfunduar stërvitjen dhe po shkonte drejt makinës së tij. Mediat greke bëjnë me dije se një breshëri plumbash është zbrazur nga një makinë që qarkullonte në atë rrugë, drejtuesit e të cilës janë ende të panjohur. Pristat e hetimeve janë të shumta, kjo pasi jeta e Berdesis ndahej mes sportit, famës dhe krimit. Në vitin 2008 ai është arrestuar në Patras, pas disa trazirave që kishte shkaktuar si pasojë e përfshirjes në grupe kriminale dhe ka qëndruar në burg për disa muaj. Tassos është cilësuar ndër boksierët më të mirë grek të 20 viteve të fundit. Ai ka fituar disa çmime jo vetëm në Greqi, por edhe në Europë.