Gratë deputete të mazhorancës dhe opozitës kanë bashkuar firmat duke propozuar një amendim në draftin për ndryshimet në Kodin Zgjedhor, që sipas tyre do të garantojë përfaqësimin e drejtë gjinor në parlament. Propozimi lidhet me nenet që parashikojnë ndarjen e mandateve në listën e hapur. Deputetet propozojnë që në rastet kur nga rirenditja e listës së hapur sipas votës preferenciale nuk rezulton që një në tre emra është grua, lista spostohet me emrin e kandidates grua që ka më shumë vota, por e rënditur më poshtë në listë. E thënë më thjesht, propozimi i deputeteve praktikisht mbyll një të tretën e listave të hapura për të garantuar përfaqësimin gjinor të përcaktuar nga Kodi Zgjedhor. Amendimi është firmosur nga të gjitha gratë deputete, si të opozitës, ashtu edhe të mazhorancës. Ndërkohë, pjesët e tjera të draftit të dakordësuar PS-PD parashikojnë aplikimin e një pragu elektoral kombëtar në nivelin 1 për qind dhe votën e diasporës përmes postës.