Një 32-vjeçar është vënë në pranga nga policia e kryeqytetit, pasi vodhi me dhunë një automjet. Nga hetimet bëhet me dije se ky shtetas është futur në një mobileri në bulevardin “Bajram Curri” të hënën e 11 dhjetorit, ku dyshohet se ka kërcënuar me një mjet prerës një shtetas, duke i vjedhur këtij të fundit çelësin e automjetit të cilin e kishte parkuar në hyrje të mobilerisë. Automjeti u gjet i braktisur në rrugën "Babë Rexha" dhe u sekuestrua në cilësinë e provës materiale. Arrestimi i të riut u bë nga shërbimet e komisariatit të policisë numër 2, në kuadër të goditjes së veprimtarive kriminale në fushën e vjedhjes së pronës dhe pasurisë dhe vënien përpara përgjegjësisë penale të shtetasve që i kryejnë ato. Materialet hetimore i kanë kaluar Prokurorisë së Tiranës, për veprime të tjera për dokumentimin e plotë ligjor të rastit.