Këngëtari serb Goran Bregoviç do të jetë një nga të ftuarit special të këtij viti në Festën e Birrës në Korçë, që do të zhvillohet nga data 18 deri 22 gusht. Lajmin e kanë dhënë vetë organizatorët përmes një njoftimi, ku kanë treguar se nata kur do të këndojë Bregovic do të jetë kulmi i festës, duke i bërë prezantim të veçantë pjesëmarrjes së tij. “Veç artistëve shqiptarë, DJ dhe grupeve më të njohura muzikore në Shqipëri, atmosfera do të kulmojë në natën finale me performancën e këngëtarit Goran Bregoviç”, thuhet në njoftimin e organizatorëve. Këngëtari serb rikthehet për herë të dytë në Shqipëri pas një koncerti të mbajtur në vitin 2006 me ftesë të kryeministrit Edi Rama, atëherë kryetar i Bashkisë së Tiranës ku prania e Bregoviç ngjalli polemika dhe debate nga disa figura të njohura. Kjo pasi shumë njerëz e lidhin figurën e tij me masakrat e kryera nga forcat serbe në luftën e Kosovës.