Një grup kriminal i akuzuar për trafik droge në zonën e Fushë Krujës u godit nga ana e SPAK këtë të mërkurë. 14 masa sigurie u lëshuan nga ana e GJKKO, nga të cilat u ekzekutuan shtatë, ndërsa tre të tjerëve iu komunikua në burg. Mes të ndaluarve është dhe djali I ish-deputetit të PS, Rrahman Rraja, Rexhep Rraja si dhe dy të afërm të tij: Gazmir Rraja dhe Perparim Rraja. Po ashtu u prangosën edhe Marvin Bushati, Agim Nina alias Lorenc Selmani, Sokol Qaja, dhe Zamir Aliaj. Ndërkohë Aldo Gjini, Jani Çavo dhe Islam Sefa ndodhen në qeli. Po ashtu vijon puna për kapjen e katër të tjerëve. Ata janë Ervis Shuli, Bujar Sefa, Hajdar Sefa dhe Vildan Baroku. Hetimet u kryen nga prokurori Andan Xholi, ndërsa grupi doli nga përgjimet në aplikacionin e koduar SKY ECC. Ata akuzohen për trafik droge të kryer në disa shtete. Aktivitetin grupi kriminal e kishte nisur në vitin 2020. Mësohet se gjatë operacionit janë sekuestruar shuma të konsiderueshme monetare, armë dhe disa automjete.