Tetë gjyqtarët e përzgjedhur për të qenë pjesë e Kolegjit Zgjedhor janë betuar në një ceremoni, ku nuk munguan masat e pandemisë covid 19, si mbajtja e maskës apo distancimi fizik. Kryetarja e Këshillit të Lartë Gjyqësor shprehu bindjen se përzgjedhja e emrave, jo vetëm ishte transparente, por edhe gjyqtarë me integritet që do të japin drejtësinë e duhur në procesin zgjedhor të 25 prillit. Por, kryetarja e KLGJ Naureda Llagami kishte edhe një tjetër mesazh për trupën e kolegjit zgjedhor. 8 gjyqtarët e përzgjedhur janë 2 gjyqtarë dhe 6 gjyqtare, konkretisht Sokol Ibi, Emona Muçi, Asim Vokshi,Gentian Medja, Esmeralda Çeka (Xhili), Alma Kolgjoka, Manjola Xhaxho, Edlira Petri , të cilët u përzgjodhën mes 16 kandidatëve. Prej disa muaj kolegji aktual ishte jashtë funksionit për shkak të dorëheqjeve të anëtarëve dhe shkarkimit nga procesi i vettingut të disa prej tyre.