GJKKO konfirmoi masat e sigurisë për 10 të akuzuarit e operacionit të koduar “Rikthimi”, të cilët u ndaluan me kërkesë të SPAK për trafik drogën drejt vendeve të Europës. Në total u lëshuan 14 masa sigurie, po katër vijojnë të jenë në kërkim. Kështu trupi gjykues pranoi kërkesën e SPAK duke lënë në fuqi arrest me burg për 10 anëtarët e grupit kriminal, mes të cilëve dhe djali i ish-deputetit të PS, Rrahman Rraja, Rexhep Rraja si dhe dy të afërm të tij: Gazmir Rraja dhe Perparim Rraja. Grupi doli nga përgjimet në aplikacionin e koduar SKY ECC. Nga hetimet deritanishme SPAK ka ngritur dyshime të mbështetura në prova, se personat e dyshuar janë përfshirë në aktivitet të paligjshëm të trafikimit të lëndëve narkotike nga Shqipëria drejt Malit të Zi me destinacion final Gjermaninë, si dhe nga Shqipëria drejt Turqisë, por dhe nga vendet e Amerikës së Jugut drejt Bashkimit Europian. Grupi ka vepruar gjatë vitit 2020, ku fillimisht iu sekuestrua në Mal të zi një sasi prej 1722 kg marijuanë, po në këtë periudhë pak ditë më vonë edhe në Holandë këtyre personave sipas SPAK, iu kap një ngarkesë me 475 kg kokainë që vinte nga ekuadori. Ndërsa episodi I tretë për të cilën akuzohen është një ngarkesë e veitit 2021 me 236 kg marijuanë që po nisej drejt Turqisë. Hetimet u kryhen me partnerët ndërkombëtarë ndërsa ndaj të akuzuarve rëndojnë tre vepra penale si ajo e grupit të strukturuar krimina dhe trafikimit të lëndëve narkotike.