"Ne duhet të jemi në gjendje që të përballemi me një luftë deri në vitin 2029". Kështu tha ministri gjerman i Mbrojtjes, Boris Pistorius, duke nënvizuar se nuk duhet menduar se Putini do të ndalet në Ukrainë. "Në një skenar serioz, ne kemi nevojë për gra dhe burra të aftë për të mbrojtur vendin. Ne duhet të parandalojmë ardhjen e më të keqes. Besoj se forma të reja të shërbimit ushtarak janë të nevojshme dhe së shpejti do të dalim me propozime konkrete”, tha Pistorius. Që në nëntor të vitit të kaluar, Pistorius kishte folur për nevojën e përgatitjes së vendit për luftë dhe tha në atë kohë se ky duhej të ishte një prioritet në politikën gjermane të mbrojtjes. Tani, qeveria e Berlinit po punon për një strategji të re mbrojtjeje, në rast krize e konflikti, që përfshin masat dhe strukturat e nevojshme për të garantuar pavarësinë dhe sovranitetin e gjermanisë. Udhëzimet sigurojnë që të gjithë aktorët kryesorë, duke filluar nga forcat e armatosura e deri te skuadrat e shpëtimit dhe autoritetet e mbrojtjes civile, mund të luajnë rolin e tyre në kohë krize. Një "plan operacional për Gjermaninë" që po hartohet aktualisht duhet të përcaktojë se "kush duhet të marrë përsipër një detyrë të caktuar, në një skenar të caktuar krize”. Udhëzimet e përgjithshme të mbrojtjes të miratuara tani zëvendësojnë rregulloret përkatëse të vitit 1989. Një risi kryesore është vëmendja e shtuar ndaj kërcënimeve që vijnë nga hapësira kibernetike dhe lufta hibride nën prag të një sulmi ushtarak. Për më tepër, nënvizohet edhe roli i Gjermanisë si një "qendër e rëndësishme" për vendosjen e trupave të NATO-s në zemër të Evropës.