Gjermania ka nisur vënien në zbatim vendimin për të ashpërsuar politikat e sigurisë dhe të azilit, pas sulmit vdekjeprurës me thikë të një shtetasi 26-vjeçar sirian, i cili besohet se i kishte shpëtuar urdhrit të dëbimit, që la të vdekur 3 shtetas dhe 8 të plagosur. Gjermania dëboi disa afganë në vendin e tyre, për herë të parë prej se talibanët morën pushtetin në Afganistan në gusht të vitit 2021. Sipas zëdhënësit të qeverisë gjermane, të gjithë afganët ishin të dënuar, nuk kishin të drejtë të qëndronin në Gjermani dhe ndaj tyre ishin lëshuar urdhra për dëbim. Agjencia e lajmeve, DPA, raportoi se një avion me 28 shtetas afganë të cilët kishin arritur në Gjermani nga shtete të ndryshme, është nisur nga Lajpcihu për në Kabul, mëngjesin e së premtes. Gjermania nuk ka marrëdhënie diplomatike me udhëheqësit talibanë në Kabul. Kancelari gjerman, Olaf Scholz, ka thënë pas një sulmi vdekjeprurës me thikë në qytetin Manhajm në fund të majit, se dëbimi i kriminelëve të rrezikshëm dhe i të dyshuarve terroristë në Afganistan dhe Siri, do të bëhet i mundur.