Jo vetëm politika gjermane, por edhe mediat, kanë reaguar pas përshkallëzimit të tensioneve në veri të kosovës dhe po i kushtojnë jo pak vëmendje zhvillimeve. Gazeta "Frankfurter Allgemeine Zeitung" në analizën e saj shkruan se ajo që po ndodh aktualisht në veriun e Kosovës është një përshkallëzim i rrezikshëm, të cilin perëndimi duhet ta marrë seriozisht. "Për shkak të konfliktit në Ukrainë shumë kanë harruar, se lufta nuk është rikthyer këtë vit në Europë. Fuçia e parë e barutit, që shpërtheu pas Rënies së Murit ishte ish-Jugosllavia. Por shumë më tepër se në Ukrainë, Brukseli dhe Uashingtoni kanë mundësi direkte të ndikimit në Ballkan. Prandaj duhet këtë herë të jetë parimisht e mundur, që ta vendosin gjendjen sërish nën kontroll. As Serbia dhe as Kosova nuk kanë interes për dhunën apo kthime serioze pas në marrëdhënien me perëndimin. Për Moskën kjo nuk vlen. Vetëm për këtë arsye është kaq urgjente, që europianët të kujdesen më fort për Ballkanin." Kurse gazeta "Märkische Zeitung" reagon në lidhje me politikën e Serbisë ndaj Kosovës dhe Rusisë. "Megjithatë Vuçiçi pritet gati me përulje nga përfaqësues të Bashkimit Europian. Kjo politikë e qetësimit ka bërë që gjendja të shkallëzohet. Prandaj ka ardhur koha për ndryshim të politikës: Faktorët perëndimorë duhet të kërkojnë qartë nga presidenti serb t'i japë fund provokimeve dhe dëshirës për fuqinë e madhe serbe dhe të kontrollojnë kanalet e rrjedhjes së parave nga Rusia. Përveç kësaj BE duhet që ta kushtëzojë dhënien e parave tek Serbia dhe të kuptojë më në fund që Vuçiçi as nuk do të hyjë në BE."