Në qytetin Pirot, në juglindje të Serbisë, është shpallur gjendje e jashtëzakonshme pasi 51 persona u dërguan në spital me simptoma të helmimit për shkak të rrjedhjes së amoniakut pas përmbysjes së një vagoni të një treni mallrash mbrëmjen e së dielës. Kryetari i komunës së Pirotit, Vladan Vasiq, shpalli gjendjen e jashtëzakonshme në këtë qytet, njoftuan mediat serbe ndërsa shkollat kanë qëndruar të mbyllura këtë mëngjes. Sipas informacioneve nga Qendra Klinike Universitare në Nish, në këtë spital janë shtruar 15 persona, 12 të rritur dhe tre fëmijë, me simptoma helmimi. Në njoftim theksohet se të gjithë pacientët janë në gjendje stabël dhe jashtë rrezikut për jetën dhe shtojnë se ata janë shtruar në spital gjatë natës. Ministria e Punëve të Brendshme ka njoftuar se “ka pasur një rrëshqitje të vagonit të një treni mallrash që mbante amoniak dhe ka pasur si pasojë rrjedhje gazit dhe përqendrim të madh të tij në atmosferë”, ka njoftuar ministria e punëve të brendshme. Ministria u bëri thirrje qytetarëve që jetojnë pranë vendit të ngjarjes “të mos largohen nga shtëpitë dhe të mos dalin jashtë”. Trafiku hekurudhor në atë zonë është ndërprerë. Punonjësit e turnit të dytë në fabrikën e gomave “Tigar Tires” në Pirot janë evakuuar, ndërsa turni i tretë, siç njofton RTS-ja, nuk do të punojë. Këtë aksident e bëri të ditur vetë kompania transportuese “Srbija Kargo”, e cila tha se bëhet fjalë për trenin e mallrave që udhëton çdo ditë, duke transportuar lëndë të parë nga Bullgaria në Prahovë dhe Shabac. “Srbija Kargo” në deklaratën e saj thekson se nuk ka viktima apo të lënduar, njofton RTS.