Trupi i një djali kurdo-iranian që u mbyt vitin e kaluar në Kanalin e Anglisë, është gjetur në Norvegji. Policia vendase tha të hënën se me anë të analizës së ADN-së, u konfirmua se bëhej fjalë për Artinin 15 muajsh, me origjinë kurdo-iraniane. Artin dhe katër familjarë të tij vdiqën kur varka me të cilën po udhëtonin, u fundos në kanalin anglez më 27 tetor 2020. Ata ishin nisur nga Franca në përpjekje për të hyrë në Angli. Policia norvegjeze tha se trupi i Artinit ishte gjetur më 1 janar 2021 në bregun jugperëndimor të vendit, pranë Karmoy. Burime nga policia thanë se që në fillim u përjashtua mundësia që trupi të ishte i një fëmije norvegjez, e para se nuk kishte asnjë denoncim për fëmijë të humbur në vend, por edhe për shkak të markës së xhupit që kishte veshur. Nga trupi u mor një profil ADN-je dhe u njoftuan familjarët e mbetur të djalit. Në fillim nuk pati ndonjë përgjigje nga ta, por pastaj u gjet një i afërm i Artinit në Oslo, nga i cili u mor një kampion ADN-je. Pas analizave doli se profilet e ADN-së përputheshin. Bashkë me Artinin u mbytën edhe 4 pjesëtarë të tjerë të familjes. Ata ishin nga qyteti Sardasht në perëndim të Iranit, pranë kufirit me Irakun. Këtë vit është dyfishuar numri i emigrantëve që kalojnë kanalin anglez me gomone, në krahasim me të njëjtën periudhë në 2020, me 3100 njerëz që mbërritën në brigjet angleze deri në fund të majit. Qeveria britanike ka premtuar një rishikim të kuadrit ligjor për emigrantët, duke u zotuar se do t’i kthejë ata në “vendin e sigurt” më të afërt.