Franca po përgatitet të shpërndajë një "manual mbijetese" për çdo familje për të ndihmuar qytetarët të përgatiten për "kërcënimet e afërta" - duke përfshirë një konflikt të mundshëm të armatosur në tokë franceze. “Manuali i mbijetesës synon të inkurajojë qytetarët që të zhvillojnë qëndrueshmërinë e tyre përballë krizave të ndryshme”, tha një zëdhënëse e kryeministrit François Bayrou për CNN të mërkurën. “Kjo përfshin fatkeqësitë natyrore, incidentet teknologjike dhe kibernetike, krizat shëndetësore si Covid-19 dhe krizat e sigurisë si sulmet terroriste dhe konfliktet e armatosura,” tha ajo. Nëse miratohet nga Bayrou, broshura me 20 faqe do t'u dërgohet familjeve përpara verës. Plani francez ndjek përditësimet e broshurave të ngjashme të lëshuara për miliona familje në Suedi dhe Finlandë, të cilat përfshijnë udhëzime se si të përgatiten për efektet e konflikteve ushtarake, ndërprerjet e komunikimit dhe ndërprerjet e energjisë elektrike, si dhe ngjarjet ekstreme të motit. Broshura e re do të jetë e ngjashme në përmbajtje me një faqe interneti të qeverisë franceze, e lançuar në vitin 2022, që ofron këshilla se si të përgatitemi për një emergjencë. Manuali do të ndahet në tre pjesë, duke ofruar këshilla praktike se si të mbroni veten dhe të dashurit përballë rrezikut të menjëhershëm. Ndër rekomandimet do të jetë edhe lista e kontakteve emergjente (shërbimi zjarrfikës, policia dhe ambulanca); të dhëna për sintonizimin në kanalet radio si edhe mënyrën e mbylljes së dyerve në rast të një aksidenti bërthamor. Manuali rekomandon një "komplet mbijetese" që përfshin edhe ujin e pijshëm, ushqim të konservuar, bateri dhe elektrikë dore. Po ashtu qytetarët këshillohen të blejnë ilace si paracetamol, kompresa dhe solucione fiziologjike.