“Franca është goditur nga vala e katërt e infeksionit nga koronavirusi që këtë herë është më e shpejtë dhe më infektuese se gjithë të tjerat”. Kjo është deklarata e zëdhënësit të qeverisë Gabriel Attal i cili tregon se numri i të infektuarve është rritur me 150 % më shumë nga java e kaluar dhe se 80 % e rasteve janë me variantin Delta. “Franca do të imponojë masat e reja të kufizimeve për të shmangur përhapjen e mëtejshme të COVID-19, i cili ndodhet në valën e katërt dhe rrezikon të krijojë një mbingarkesë të sistemit shëndetësor,” tha zëdhënësi i qeverisë. Ky i fundit ka shtuar se pavarësisht protestave masive kundër planeve për të ndaluar hyrjen e të pavaksinuarve në ambjentet publike si baret, restorantet, muzeumet, stadiumet dhe teatrot, këto masa do të hyjnë në fuqi duke filluar nga data 1 gusht dhe do të zbatohen me rigorozitet nga forcat e rendit. Plani, i cili përfshin edhe vaksinimin e detyrueshëm për punonjësit shëndetësorë, përfaqëson disa nga masat më të ashpra kundër Covid-19 në Europë. Sipas të dhënave, në 24 orët e fundit në Francë u regjistruan 18 mijë raste të reja me koronavirus, ndërkohë që një javë më parë këto shifra nuk i kalonin 7 mijë. Prej disa ditësh francezët kanë dalë në protesta kundër vendimit të qeverisë për të bërë të detyrueshme marrjen e vaksinës së punëtorëve të disa sektorëve.