Një ngjarje tragjike ka ndodhur në ishullin grek të Parosit, ku një foshnjë 5-muajshe me prindër shqiptarë ka humbur jetën. Autoritetet greke kanë nisur një hetim penal për rastin, duke arrestuar prindërit me akuzën e “ekspozimit fatal të një të mituri”. Detajet rreth rrethanave të vdekjes mbeten të paqarta, pasi deklaratat e prindërve janë kontradiktore. Nëna ka treguar se e kishin lënë foshnjën të flinte në makinë, ndërsa ata ndodheshin në plazh me fëmijët e tjerë. Ndërkohë, babai ka deklaruar se e kishin marrë vajzën me vete në det. Një banor lokal tha për mediat greke se familja kishte shkuar për pushime në plazh me katër fëmijët e tyre, duke shtuar se foshnja mund të jetë lënë në automjet në temperatura të larta. Policia po merr në pyetje dëshmitarë dhe po analizohen të gjitha provat e mundshme në vendngjarje. Ndërkohë, pritet autopsia që do të përcaktojë shkakun zyrtar të vdekjes së foshnjës.