Udhëheqësi i Koresë së Veriut, Kim Jong Un, mbikëqyri provën e lëshimit të raketave hipersonike "të teknologjisë së fundit" për të përgatitur forcat bërthamore të Phenianit për luftë, thanë mediat shtetërore të hënën. Pheniani tha se testi i së dielës u bë edhe më i nevojshëm nga "kriza e fundit gjeopolitike", një referim i qartë ndaj ngjarjeve të kësaj fundjave në aleatin socialist të Koresë së Veriut, Venezuelë. Seuli dhe Tokio thanë të dielën se kishin zbuluar lëshimin nga afër Phenianit të dy raketave balistike. Ky ishte testi i parë i vendit për këtë vit dhe ndodhi vetëm disa orë para se udhëheqësi i Koresë së Jugut, Lee Jae Myung, të shkonte në Pekin për një samit. Lee ka thënë se shpreson ta përdorë vizitën për të shfrytëzuar ndikimin e Kinës mbi Korenë e Veriut për të përmirësuar lidhjet e Seulit me Phenianin. Të hënën, Agjencia Qendrore Koreane e Lajmeve, KCNA, citoi Kim të thoshte se testi tregoi "gatishmërinë e forcave bërthamore të Koresë së Veriut”. Sipas tij, vendi ka realizuar arritje të rëndësishme në vendosjen e forcave bërthamore në një bazë praktike dhe përgatitjen e tyre për një luftë të vërtetë. Operacioni përfaqëson një skenar makthi për udhëheqjen e Koresë së Veriut, e cila prej kohësh ka pasur frikë nga një i ashtuquajtur "sulm me prerje koke" si ai që u pa në Venezuelë dhe akuzoi Uashingtonin se po kërkon ta largojë atë nga pushteti. Pheniani për dekada të tëra i ka justifikuar programet e tij bërthamore dhe raketore duke i konsideruar një pengesë kundër përpjekjeve të supozuara për ndryshim regjimi nga Uashingtoni.