Policia në kazakistan ka nisur hetimin pas shfaqjes për një kohë të shkurtër të flamurit ukrainas në një ekran të madh LED në kryeqytetin, Astana, gjatë një vizite atje të presidentit rus Vladimir Putin, tha të enjten ministria e brendshme e vendit. Flamuri i Ukrainës - me brezat e tij horizontalë blu dhe të verdhë - u shfaq shkurtimisht të mërkurën vonë, në vend të flamurit trengjyrësh rus të bardhë, blu dhe të kuq, në një ekran të vendosur në një nga rrugët kryesore të Astanas. Putin ishte në qytet në atë kohë dhe ekrani u fik shpejt, por imazhet dhe videot e incidentit qarkulluan menjëherë në internet. Ministria e Brendshme tha në një deklaratë se po shqyrtonte të gjitha versionet e mundshme, duke përfshirë një defekt teknik dhe një sulm të hakerave. Sipas një sondazhi të opinionit publik të kryer vitin e kaluar, shumica e kazakëve janë neutralë në lidhje me luftën Rusi-Ukrainë, por mes të tjerëve, mbështetësit e Ukrainës janë dukshëm më të shumtë në numër se ata të Rusisë. Dhe me Rusinë që është një nga partnerët më të mëdhenj tregtarë të Kazakistanit, problemet në ekonominë e saj shpesh amplifikohen dhe pasojat ndihen jashtë kufijve të saj. Të enjten, monedha tenge e Kazakistanit ra në nivelin më të ulët historik kundrejt dollarit amerikan, pas një dobësimi të shpejtë të rublës ruse.