Sekretari i Përgjithshëm i NATO-s, Mark Rutte, tha të enjten se një fitore e Rusisë kundër Ukrainës do të minonte fuqinë parandaluese të aleancës më të madhe ushtarake në botë dhe do t’i kushtonte asaj triliona euro për të rikthyer besueshmërinë. NATO-ja është duke shtuar praninë përgjatë krahut lindor me Rusinë, Bjellorusinë dhe Ukrainën, pasi ka dërguar atje mijëra trupa dhe pajisje për të frenuar Moskën nga përhapja e luftës së saj edhe në territoret e ndonjë prej 32 anëtarëve të aleancës. “Nëse Ukraina humb, atëherë për të rikthyer fuqinë frenuese të pjesës tjetër të NATO-s, çmimi do të jetë shumë, shumë më i lartë sesa ai që po e përmendim në këtë kohë në lidhje me rritjen e shpenzimeve dhe prodhimit tonë industrial”, tha Rutte. “Nuk do të jenë miliarda shtesë; do të jenë triliona shtesë”, shtoi ai, duke folur në margjinat e Forumit Ekonomik Botëror në Davos të Zvicrës. Rutte nguli këmbë se mbështetësit perëndimorë të Ukrainës duhet “të rrisin, e jo ta zvogëlojnë mbështetjen” që janë duke i dhënë asaj, pothuajse tre vjet pas fillimit të pushtimit të plotë nga Rusia. “Ne duhet të ndryshojmë trajektoren e luftës”, tha Rutte, duke shtuar se Perëndimi “nuk mund të lejojë që në shekullin e XXI-të një shtet ta pushtojë një shtet tjetër dhe të përpiqet ta kolonizojë atë”. Në Evropë është duke u rritur frika se presidenti amerikan, Donald Trump, mund të kërkojë t’i japë fund shpejt luftës duke mbajtur bisedime me presidentin rus, Vladimir Putin, në kushte që janë të pavolitshme për Ukrainën, por Rutte u duk i kujdesshëm për të mos i bërë gjërat me nxitim. “Nëse kemi marrëveshje të keqe, ajo do të nënkuptonte se do ta shihnim presidentin e Rusisë duke festuar me liderët e Koresë së Veriut, Iranit dhe Kinës, dhe këtë nuk mund ta pranojmë”, tha ish-kryeministri holandez. “Ky do të ishte një gabim i madh gjeopolitik”, shtoi Rutte.