Presidenti rus, Vladimir Putin, ka uruar Nicolas Maduron për një mandat të ri presidencial në Venezuelë, duke thënë se Moska gëzohet për partneritetin strategjik me këtë shtet në Amerikën Jugore, dhe që Maduro është gjithmonë i mirëpritur në Rusi. Maduro dhe rivali i tij opozitar, Edmundo Gonzalez, kanë shpallur të dy fitore në zgjedhjet presidenciale, ndërsa Uashingtoni dhe Qeveri të tjera të huaja, janë të shqetësuara dhe dyshojnë në të dhënat zyrtare që e kanë nxjerrë Maduron si fitues. Autoriteti zgjedhor tha pas mesnate se Maduro ka fituar mandatin e tretë me 51 për qind të votave, rezultat që mund ta zgjasë deri në çerek shekulli pushtetin e tij. “Marrëdhëniet ruso-venezuelase kanë karakterin e partneritetit strategjik”, tha Putin në mesazhin drejtuar Maduros, bëri të ditur Kremlini. “Jam i bindur që veprimet tuaja në krye të shtetit do të vazhdojnë të kontribuojnë në zhvillim progresiv në të gjitha drejtimet”. “Mos harroni, ju jeni gjithmonë i mirëseardhur në tokën ruse”, është cituar të ketë thënë Putin. Më herët, sekretari amerikan i Shtetit, Antony Blinken, tha se Uashigtoni ka shqetësimet serioze që rezultatet nuk reflektojnë vullnetin e popullit.