Sistemi i ri i fiskalizimit ka hasur kundërshtime nga përfaqësuesit e bizneseve. Kasat fiskale aktuale i kanë kushtuar një kosto të konsiduerueshme biznesit shqiptar, ndaj zëvendësimi i tyre brenda një kohe të shkurtër me pajisje të reja nuk është pritur aspak mirë. Megjithatë bazuar në shifrat e publikuara nga drejtoria e përgjithshme e tatimeve, duket se Shqipëria po e përqafon reformën fiskale. Ende pa u përfunduar faza e parë e zbatimit të kësaj reforme, në harkun kohor të 4 muajve janë lëshuar 49 mijë e 960 fatura elektronike nga 7 mijë e 611 tatimpagues. Faza e dytë e reformës fiskale përfshin transaksionet pa para në dorë midis tatimpaguesve, nga biznesi tek biznesi , dhe fillon në datën 1 Korrik 2021. Kjo fazë përkufizon monitorimin e pagesave të këtyre transaksioneve nëpërmjet sistemit bankar. Ndërkohë faza e tretë e reformës fiskale do të përfshijë transaksionet me para në dorë, nga biznesi tek konsumatori ,dhe fillon në datën 1 Shtator 2021. Pavarësisht detyrimit për t’u përfshirë në Fiskalizim sipas afateve të mësipërme, Administrata Tatimore sqaron se të gjithë subjektet kanë mundësi të fiskalizojnë transaksionet e tyre përpara këtyre afateve.