Djemtë vendosin në kokë helmeta të përdorura dhe armët e tyre nuk mund të vrasin...por, lufta që ata e luajnë në një fushë të gjelbër të Ukrainës, është reale për ta dhe mbart pasoja. Kur ka kaluar tashmë një vit nga pushtimi rus, luftimet janë bërë pjesë e lojërave të fëmijëve duke i prekur ata në një mënyrë që do ta mbajnë gjithnjë me vete. Më pëlqen shumë të luaj luftash. Unë dua të rritem dhe të jem një hero i vërtetë lufte – thotë 10 vjecari Maksim Mudrak, i veshur me uniformë ushtarake, për fëmijë, me një helmetë që është shumë e madhe për kokën e tij, dhe me një armë plastike në dorë. Babai i Maksimit, që nuk ishte ushtar, është vrarë afër Kievit, në ditët e para të luftës, ndërsa po shkonte ti dërgonte ushqime mbrojtësve vullnetarë. Gjyshja e vogëlushit thotë tani se Maksimi, është bërë më i interesuar për luftën që pas humbjes së të atit. Ai mendon gjithnjë për të, shkon në varreza dhe qan. Tani do të bëhet ushtar që të ruajë kujtimin e të atit dhe e ka një ide të qartë se kush është përgjegjës për atë që po ndodh në vendin e tij. Për mua – thotë 10 vjecari – rusët janë armiku më i keq...