Brenda banesës së Pjerin dhe Ylli Brahimaj, babë e birë, policia e Tiranës zbuloi një ambient të fshehtë që ishte përshtatur si laborator, ku prodhoheshin dhe falsifiksoheshin dokumenta me qëllim dhënien e ndihmës për kalim të paligjshëm të kufirit. Shërbimet e policisë arrestuan dy të dyshuarit, të moshave 65 dhe 45 vjec, ndërsa po hetohet në gjendje të lirë bashkëpunëtori i tyre. Ylli Brahimaj nuk është emër i panjohur për policinë e shtetit. Ky i fundit madje, ndodhej në masën e arresit shtëpiak me vendim të GJKKO, lidhur me një operacion që u zhvillua nga Prokuroria e Posaccme në qershor të 2024, ku u shkatërrua një grup kriminal i trafikut të qenieve njerëzore, që përmes falsifikimit të dokumenteve kontrabandonin emigrantë të paligjshme kryesisht drejt Mbretërisë se Bashkuar dhe Republikës së Irlandës. Hetimi i kryer nga prokuroria e Tiranës zgjati 7 muaj, ku u ndoqën metoda speciale, deri në momentin që operacioni i koduar Identiteti, coi në pranga dy persona. Sipas hetimeve të deritanishme, babë e birë përfitonin 15 deri në 20 mijë euro cdo pasaportë që ata prodhinin dhe falsifikonin me shtetësi të huaj. Këto pasaporta dyshohet se përdoreshin për kalimin e paligjshëm drejt vendeve të Bashkimit Evropian ose SHBA. Policia e Tiranës thotë se po identifikohen persona të tjerë të përfshirë në këtë aktivitet.