Reality-show më i ndjekur në mbarë shqiptarinë, Big Brother Vip 3 është gati të ngrejë siparin, teksa ka nisur edhe numërimi mbrapsht për mbrëmjen e parë, atë të 13 janarit, kur shtëpia më e famshme të hap dyert. Ashtu siç është konfirmuar tashmë edhe zyrtarisht spektakli do të drejtohet nga i mirënjohuri Ledion Liço, i cili rikthehet në Big Brother si moderator për herë të dytë, pas atij në vitin 2015. Megjithëse deri më tani nuk është konfirmuar asnjë nga konkurrentët që do bëhen pjesë e shtëpisë, në rrjet kanë qarkulluar disa emra të personazheve VIP. Në një intervistë për “Më lër të flas”, producentja Sara Hoxha zbuloi se numri i banorëve në shtëpinë e Big Brother Albania VIP do të jetë dy herë më i madh sesa ai i edicionit të kaluar, teksa nuk do të mungojë as pishina, që këtë herë do të jetë me ujë të ngrohtë, për t’u shfrytëzuar në çdo moment. Një vend të rëndësishëm në spektaklin e këtij viti do të ketë edhe fituesi i Big Brother Albania VIP2, Luiz Ejlli, që me lojën e tij brenda shtëpisë, bëri për vete miliona shqiptarë. Megjithatë producentët kanë zgjedhur të mos zbulojnë rolin e Luizit në këtë edicion. Natyrisht nuk do të mungojnë as detaje të tjera speciale, për ta bërë edhe më spektakolar këtë edicion, teksa surprizat do të nisin të zbulohen mbrëmjen e 13 janarit dhe do të vazhdojnë për më shumë se 100 ditë në ekranin e Top Channel dhe në dy kanale të dedikuara në DigitAlb.