Sedat Peker, bosi i mafias turke, vazhdon të publikojë video teksa flet për përfshirjen e njerëzve të pushtetit në krime të ndryshme. Njeriu që po trondit Turqinë, publikoi edhe videon e nëntë, e cila brenda 24 orëve është parë rreth dhjetë milionë herë në YouTube. Në videon e re, 49-vjeçari ka pohuar se presidenti turk, Recep Tayyip Erdogan, po e shfrytëzon fenë për popullizëm duke dhënë disa shembuj me Palestinën dhe shtetet e Ballkanit. Peker tregon sesi investimet kryesore të shtetit turk janë në vendet që kanë kryer krime kundër myslimanëve, si në rastin e Serbisë ndërkohë që fjalimet e tij publike janë sikur të ishte lider i botës islame. “Vendet e Ballkanit i kam vizituar fshat më fshat. Njerëzit e shteteve myslimane po më thonë, ‘Si është e mundur që të gjitha ndihmat dhe investimet i keni ndaluar për ne ndërsa ato i keni dërguar tek shteti që na ka përdhunuar dhe masakruar, Serbia. Shtetet ballkanike nuk po e konsiderojnë më lider të myslimanëve. Gjithashtu edhe tek arabët e ka humbur besimin”, tha ai. Theksojmë se akuzat që Peker ka ngritur ndaj aleatëve të Erdoganit, duke përfshirë një ish-kryeministër, Binal Yildirim, zyrtarë të lartë dhe të afërmit e tyre, variojnë nga korrupsioni dhe trafiku i drogës te përdhunimet dhe atentatet. Mafiozi turk që aktualisht është në Dubai ka folur edhe për kohën që ka qëndruar në Kosovë dhe deportimin e tij për në Shqipëri nga ku ka shkuar në Marok.