Drejtuesi për Tiranën I koalicioni ‘Nisma Shqipëria Bëhet’, Endrit Shabani, vijon me takimet në kuadër të fushatës elektorale. Shabani është ndalur në takime në rrethina të Tiranës, duke takuar e biseduar me banorë të këtyre zonave për problematikat me të cilat ato përballen. Një nga problematikat e ndeshura, është mbyllja e shkollës në Priskë, shkak për të cilën është bërë rrëshqitja e gurëve nga një gurore në zone. “Shkollën e Priskës e kanë mbyllur sepse gurët e gurores binin mbi kokat e nxënësve. Tani fëmijët ecin 5 km në këmbë për të shkuar në shkollë. Një qeveri që ka dërguar dy satelitë në hapësirë, nuk dërgon dot ende fëmijët në shkollë”, shkruan ndër të tjera Endrit Shabani, i cili vetë kandidon në Tiranë për “Nisma Shqipëria Bëhet”. Sipas Shabanit “Një grusht njerëzish kanë shfrytëzuar lumin, malet, pyjet dhe tokën dhe janë pasuruar duke e lënë fshatin në varfëri.” Për këtë ai kërkoi mbështetje të qytetarëve për të bërë ndryshimin më 11 maj.