Izraeli tha se në një nga sulmet ajrore që ka kryer në periferi të Bejrutit më herët gjatë këtij muaji është vrarë një zyrtar i lartë i Hezbollahut që gjerësisht pritej të zëvendësonte udhëheqësin e hershëm të grupit, Hassan Nasrallah, i cili u vra gjatë një sulmi izraelit muajin e kaluar. Nuk ka pasur një konfirmim të menjëhershëm nga Hezbollahu lidhur me fatin e Hashem Safieddine, një klerik i fuqishëm i cili pritej të zëvendësonte Nasrallahun në krye të grupit. Safieddine u vra në fillim të tetorit gjatë një sulmi që la të vrarë edhe 25 udhëheqës të tjerë të Hezbollahut, tha Izraeli. Izraeli muajve të fundit ka vrarë shumë udhëheqës të lartë të Hezbollahut gjatë sulmeve që ka kryer në jug të Libanit, duke shkaktuar kaos në grup. Javën e kaluar, Izraeli vrau edhe Yahya Sinëarin, udhëheqësin e Hamasit gjatë një operacioni në Gazë. Sekretari amerikan i Shtetit, Antony Blinken, që ishte në Izrael të martën, ku u takua me udhëheqësit e lartë të vendit, tha se duhet të “kapitalizohet” vdekja e Sinëarit si një mundësi për t’i dhënë fund luftës në Gazë dhe për të arritur lirimin e pengjeve izraelite. Kryediplomati amerikan po ashtu kërkoi që Izraeli të bëjë më shumë për të ndihmuar në rritjen e dërgesave humanitare për palestinezët.