Policia e Peqinit ka vënë në pranga dy shtetas, mëngjesin e kësaj të mërkure, pasi dyshohet se kanë bashkëpunuar me autorët e vrasjes së 32 vjeçarit, Albi Bashaliu, ngjarje e ndodhur të hënën e kësaj jave. Referuar burimeve zyrtare, policia e Peqinit ka arrestuar, 41 vjeçarin, Veiz Bashaliu, familjar i viktimës dhe Mikel Xhaja, 30 vjeç, të dy banues në fshatin Gjoçaj, atje, ku edhe ndodhi atentati ndaj Bashaliut. Këta dy persona kanë kryer veprime për të fshehur rrethanat e ngjarjes dhe kanë penguar aktivisht organet e Policisë në punën hetimore për të zbardhur detajet e ngjarjes si dhe motivin. Ekzekutimi, ndodhi mëngjesin e 27 dhjetorit, në afërsi të fshatit Gjoçaj. Autorët, pasi kanë djegur mjetin e tyre në vendngjarje, janë larguar me makinën e Bashaliut. Automjeti i viktimës, tip “Volksvagen” u gjet i djegur nga policia në aksin rrugor Gosë-Vibashtovë të Rrogozhinës.