Një ditë para se Rusia të niste sulmin në Ukrainë në 24 shkurt, Presidenti i Polonisë Andrzej Duda vizitoi Kievin dhe premtoi se “Polonia nuk do ta linte asnjëherë vetëm Ukrainën”. Me nisjen e agresionit, Polonia i mirëpriti ukrainasit që iknin nga lufta. Polonia ka qenë po ashtu më e zëshmja dhe e para në dërgimin e armëve të perëndimit dhe ndihmave humanitare në Ukrainë. Dhe sipas shumë ekspertëve, kërcënimi rus ka qenë ai që ndryshoi raportet mes Ukrainës dhe Polonisë, që jo përherë kanë qenë të lehta. Në maj, Presidenti i Polonisë, Duda foli në Parlamentin e Ukrainës, duke u bërë kështu udhëheqësi i parë i huaj që e bënte këtë që prej nisjes së luftës. Ai nënvizoi mbështetjen ndaj aspiratës së Ukrainës për t’u bërë pjesë e Bashkimit Europian dhe kritikoi disa qendrime të autoriteteve në Europë se Ukraina duhet të pranonte disa nga kërkesat e Presidentit të Rusisë Vladimir Putin. Sipas presidentit polak, çdo lëshim territorial për Rusinë do të paraqiste një goditje për të gjithë Perëndimin. “Vetëm Ukraina mund të përcaktojë të ardhmen e saj. Bota duhet të kërkojë që Perëndimi të ndërhyje për tërheqjen e plotë ruse nga territori i Ukrainës dhe të ndalojë shkeljen e ligjit ndërkombëtar”, deklaroi ai. Që nga fillimi i luftës, Polonia u bë vendi kryesor që mbështeti me armatime Ukrainën dhe së bashku me vende të tjera balltike, tentuan të ushtrojnë ndikim për integrimin e Ukrainës në Bashkimin Europian dhe në NATO. Mbështetja e Varshavës për Kievin ndihmoi edhe në përmirësimin e marrëdhënieve Poloni-SHBA, marrëdhënie të cilat kanë qenë të vështira. Presidenti amerikan, Biden vizitoi Poloninë në mars, ku takoi refugjatë ukrainas dhe trupat amerikane në terren. Gjatë vizitës, ai theksoi objektivin strategjik të Shteteve të Bashkuara për të mbështetur Ukrainën në luftën e saj për demokraci dhe vetëvendosje dhe e cilësoi Poloninë si një “fushëbetejë” të rëndësishme në përpjekjen për liri dhe siguri në Europë. E ndërsa territori polak është bërë një bazë për mbështetjen ukrainase, Polonia është bërë një aleat i domosdoshëm i SHBA-së për sigurinë evropiane.