Situata në kosovë është rënduar pas reshjeve të dendura të shiut orët e fundit, që kanë shkaktuar përmbytje të mëdha në shumë zona. Qeveria dhe institucionet në varësi të saj thanë se janë angazhuar për të garantuar kthimin në normalitet. Skenderaj dhe Mitrovica janë dy komunat e prekura më rëndë dhe autoritetet kanë shpallur gjendje të jashtëzakonshme. Megjithëse, të dy komunat nga përditësimet më të fundit në terren thonë se gjendja është nën kontroll.Ministrat Xhelal Sveçla, Artanë Rizvanolli dhe Elbert Krasniqi kanë qëndruar natën e shkuar në Mitrovicë ku edhe kanë inspektuar situatën në rrugën kombëtare Mitrovicë Bërnjak, që pjesërisht mbetet e bllokuar për shkak të rrëshqitjeve të dheut. Ministrat u ndalën edhe në liqenin e Ujmanit ku pavarësisht nivelit të lartë të ujit, situata po menaxhohet mirë. Në zonë, po kontribuon edhe policia në menaxhimin e situatës dhe ndihmën e qytetarëve. Ndërkohë, në fshatin Drejë të Istogut, FSK evakuoi 14 familje me rreth 60 anëtarë që kishin mbetur të bllokuar mes ujit gjatë të enjtes.