Letonia ka rikthyer shërbimin e detyrueshëm ushtarak ndërsa vendi anëtar i NATO-s po merr masa për të parandaluar një tentativë të mundshme të rusisë për të pushtuar evropën. Shërbimi i detyrueshëm ka nisur tani në vendin baltik që nga janari dhe atë do ta kryejnë të gjithë burrat e moshës nga 18 deri në 27 vjec. Secili duhet të kryejë një vit shërbim për vendin, edhe nëse jeton jashtë. Letonia shpreson të ketë një trupë luftarake prej 61 mijë ushtarësh të ndarë në aktivë dhe njësi rezervë. Kjo vjen ndërsa ekspertët paralajmërojnë se shumë shpejt do të ketë ndryshim politikash edhe në Britaninë e Madhe, ku po flitet tani për trajnimin e një ushtrie qytetarësh për të parën herë që pas luftës së dytë botërore. “Ne kemi rikthyer shërbimin e detyrueshëm ushtarak për të rritur përmasat e trupave tona, aktivë dhe rezërvë”, tha ministri i jashtëm letonez Krisjanis Karins. “Ne duhet të jemi në gjendje të tillë gatishmërie që ti detyrojmë gjeneralët dhe politikanët rusë të kuptojnë që rruga drejt evropës është pa kthim”, tha ai. Vendi në evropën lindore ka rritur masat mbrojtëse duke përforcuar ushtrinë dhe forcat rezervë ndërkohë që ka zgjeruar edhe arsenalin e tij të armëve. Kushdo që refuzon shërbimin ushtarak mund të përballet me gjobë ose dënim me burg. Por njerëzit me kushte të caktuara shëndetësore, prindërit e vetëm dhe qytetarët me dyshtetësi që kanë shërbyer jashtë vendit, mund të kursehen nga thirrja nën armë. Muajin e kaluar ndërkohë, shefi shtabit të përgjithshëm të ushtrisë britanike, sir Patrick Sanders, tha se vendi duhet të trajnonte një ushtri qytetarësh për tu përgatitur për një luftë të mundshme. E madje edhe kjo sipas tij nuk do të ishte e mjaftueshme pasi mori si shembull aleatët në evropën lindore dhe veriore, që po shtrojnë bazat për mobilizime në shkallë kombëtare.