Sezoni veror ka rikthyer edhe njëherë trafikun e rënduar të fundjavës në disa akse rrugore të vendit. Në tre muaj vere, kryesisht e shtuna dhe e diela krijojnë radhë kilometrike automjetesh në disa prej rrugëve kryesore në vend. Fluks të lartë automjetesh ka patur këtë të dielë në aksin rrugor Durrës-Tiranë, ku pushuesit janë kthyer sërish në kryeqytet, për tu rikthyer më pas në punë ditën e hënë. Vlora po ashtu që prej mëngjesit deri në orët e pasdites, ka ndjerë trafikun e rënduar në akset kryesore te qytetit. Lungomare, rruga transballkanike dhe aksi rrugor Vlorë-Orikum nga zona e Ujit të Ftohtë deri pranë Radhimës, kanë qenë tre nga akset më të paralizuara nga trafiku i automjeteve. Policia rrugore dhe ajo e rendit, kanë qenë të pranishëm në këto akse për të drejtuar automjetet dhe për të normalizuar situatën e rënduar.