Në tavolinën e grupit hetimor është shtrirë pista e dyshimit mbi konfliktet që mund të ketë patur grupi i Emiljano Shullazit, pjesë e të cilit ishte edhe Gilmando Dani, 47 vjeçari që mbeti viktimë e atentatit mafioz mesditën e së martës në rreth rrotullimin e Rinasit, në një distancë të shkurtër me aeroportin “Nënë Tereza”. Pamjet filmike që grupi hetimor ka administruar nga aeroporti, kamerat e sigurisë së dy pikave të karburantit rreth 20 metra larg vendit të ngjarjes si dhe pamje të tjera të bizneseve aty pranë kanë qartësuar hetuesit mbi dinamikën e ngjarjes. I gjithë itinerari i përshkuar, konkretisht lëvizja e autorëve nga zona e Niklës në drejtim të aeroportit dhe largimi në drejtim të fshatit Halil për të djegur automjetin tip “Toyota” që u përdor për atentatin, është kqyrur nga hetuesit.